భారతీయ చలనచిత్ర సంగీత ప్రపంచంలో 'ఆశా భోస్లే' అనేది కేవలం ఒక పేరు కాదు, అదొక శకం. దశాబ్దాల పాటు తన గాత్రంతో కోట్లాది మందిని అలరించిన ఆమె ప్రయాణం ఎందరికో స్ఫూర్తిదాయకం.

ఆశా భోస్లే 1933, సెప్టెంబర్ 8న మహారాష్ట్రలోని సాంగ్లీలో జన్మించారు. ఆమె తండ్రి పండిట్ దీనానాథ్ మంగేష్కర్ ఒక శాస్త్రీయ సంగీత విద్వాంసుడు మరియు నాటక కళాకారుడు. ఆశాకి తన తండ్రి నుండే సంగీతం వారసత్వంగా అబ్బింది. ఆమె అక్క లతా మంగేష్కర్ కూడా ప్రపంచ ప్రఖ్యాతి గాంచిన గాయని అన్న విషయం మనందరికీ తెలిసిందే. ఆశా తన తొమ్మిదవ ఏటనే తండ్రిని కోల్పోయారు. ఆ సమయంలో కుటుంబాన్ని ఆదుకోవడానికి ఆమె, లతా మంగేష్కర్ కలిసి సినిమాల్లో పాడటం, నటించడం ప్రారంభించారు.

1943లో 'మాఝా బాల్' అనే మరాఠీ చిత్రంతో ఆశా భోస్లే తన గాయనీ ప్రస్థానాన్ని మొదలుపెట్టారు. హిందీలో 1948లో 'చునరియా' సినిమా ద్వారా మొదటిసారి పాడారు. అయితే, ఆ సమయంలో గీతా దత్, శంషాద్ బేగం, ఆమె అక్క లతా మంగేష్కర్ వంటి దిగ్గజాలు ఇండస్ట్రీని ఏలుతుండటంతో, ఆశాకి మొదట్లో కేవలం చిన్న చిన్న అవకాశాలు లేదా నెగటివ్ పాత్రల పాటలే దక్కేవి.

1950వ దశకం చివరలో ఆశా కెరీర్ మలుపు తిరిగింది. సంగీత దర్శకులు ఓ.పి. నయ్యర్, ఎస్.డి. బర్మన్ ఆమెలోని ప్రతిభను గుర్తించి గొప్ప అవకాశాలు ఇచ్చారు. 1957లో వచ్చిన 'నయా దౌర్' సినిమా ఆమెకు పెద్ద బ్రేక్ ఇచ్చింది. ఆ తర్వాత ఆమె వెనుదిరిగి చూసుకోలేదు.

ఆమె పాడలేని పాట లేదు. క్లాసికల్, గజల్స్, పాప్, క్యాబరే, భక్తి గీతాలు.. ఇలా ప్రతి విభాగంలోనూ తన ముద్ర వేశారు. ముఖ్యంగా ఆర్.డి. బర్మన్ సంగీతంలో ఆమె పాడిన 'దమ్ మారో దమ్', 'పియా తూ అబ్ తో ఆజా' వంటి పాటలు నేటికీ కుర్రకారును ఉర్రూతలూగిస్తాయి.

ఆశా భోస్లే వ్యక్తిగత జీవితం అనేక ఒడిదుడుకులతో సాగింది. తన 16వ ఏటనే కుటుంబ సభ్యుల ఇష్టానికి వ్యతిరేకంగా గణపత్ రావు భోస్లేను వివాహం చేసుకున్నారు. కానీ ఆ బంధం ఎంతో కాలం నిలవలేదు. ఆ తర్వాత ప్రముఖ సంగీత దర్శకుడు ఆర్.డి.బర్మన్ ను ఆమె వివాహం చేసుకున్నారు. వారిద్దరి జోడీ సంగీత ప్రపంచంలో ఎన్నో అద్భుతాలను సృష్టించింది.

ఆశా భోస్లే దాదాపు 7 దశాబ్దాల (70 ఏళ్లు) పాటు సంగీత ప్రపంచాన్ని శాసించారు. గిన్నిస్ వరల్డ్ రికార్డ్స్ ప్రకారం, ఆమె అత్యధికంగా పాటలు రికార్డ్ చేసిన గాయనిగా గుర్తింపు పొందారు. ఆమె 20కి పైగా భారతీయ భాషల్లో సుమారు 12,000 నుండి 20,000 వరకు పాటలు పాడారని అంచనా. తెలుగులో కూడా ఆమె ఎన్నో అద్భుతమైన పాటలు పాడి ఇక్కడి ప్రేక్షకులకు దగ్గరయ్యారు.

ఆమె ప్రతిభకు గుర్తింపుగా భారత ప్రభుత్వం 2000లో దాదాసాహెబ్ ఫాల్కే అవార్డు, 2008లో పద్మ విభూషణ్ పుర‌స్కారాన్ని అందించింది. రెండు సార్లు ఉత్త‌మ గాయ‌నిగా జాతీయ అవార్డులు అందుకున్నారు. అలాగే ఎన్నో ఫిలింఫేర్ అవార్డుల‌తో పాటు లైఫ్ టైమ్ అఛీవ్‌మెంట్ అవార్డు కూడా ఆమెను వ‌రించింది.